Američki košarkaš Rašid Sulejmon novi je košarkaš Budućnost Volija, objavili su iz ovog kluba.
Momak rođen u Hjustonu, ima 30 godina, visok je 193 cm i igra na poziciji beka.
Nakon što je igrao na Univerzitetima Djuk i Merilend, evropsku karijeru počinje u francuskom Dižonu.
Nakon Dižona seli se u Metropolitan iz Pariza, ali se vraća u Dižon sa kojim 2020. osvaja Kup Francuske, gdje je proglašen za MVP-a turnira.
U Francuskoj je igrao i za Burg sa kojim je igrao upravo protiv nas, gdje je na dvije utakmice ubacio 23 poena.
Osim Francuske, igrao je u Španiji, Turskoj, Kini, a prošle godine je bio član litvanskih Vulvsa.
Sulejmon je bio šampion svijeta sa ekipom SAD na Mundobasketu do 19 godina 2013. godine, sa generacijom koju je predvodio Aron Gordon.
„Sulejmon je igrač koga prije svega krasi sjajan šut, a kada dobijete na takmičenju u brzom šutiranju trojki u sred Litvanije, koja je „trojkaški El Dorado“, onda znate da možete se radi o izvrsnom šuteru. Pored šuta odličan je kao sekundarni organizator igre i bez sumnje s njim se dobija širina u napadu“, navodi se u saopštenju Budućnost Volija.
